កំពង់ស្ពឺ៖ ដូចតាមការសន្យា អភិបាលខេត្តកំពង់ស្ពឺ លោក វ៉ី សំណាង នារសៀលថ្ងៃទី០៤ ខែធ្នូនេះ បានប្រគល់រង្វាន់ជាម៉ូតូម្នាក់មួយគ្រឿងដល់សិស្សនិទ្ទេស A សម័យប្រឡងឆ្នាំ២០២៣ ក្នុងខេត្តកំពង់ស្ពឺ សរុបចំនួន ១៧នាក់ ដើម្បីលើកទឹកចិត្តដល់ពួកគេដែលបានខិតខំរៀនរហូតដល់ទទួលបានលទ្ធផលល្អ។

លោកអភិបាលបានសរសេរនៅក្នុងទំព័រហ្វេសប៊ុករបស់ខ្លួនថា៖ «អបអសាទរ សិស្សនិទ្ទេស A ឆ្នាំសិក្សា ២០២២-២០២៣ ទាំង ១៧រូប ជាមោទនភាពសម្រាប់ខេត្តកំពង់ស្ពឺ»។

ជារៀងរាល់ឆ្នាំ លោកអភិបាលខេត្តកំពង់ស្ពឺ តែងតែប្រកាសផ្តល់រង្វាន់ជាម៉ូតូ ដល់សិស្សដែលប្រឡងជាប់និទ្ទេស A ខណៈអភិបាលខេត្តមួយចំនួនទៀតក៏បានផ្តល់រង្វាន់ជាម៉ូតូ និងរង្វាន់ផ្សេងៗទៀតផងដែរ។

លទ្ធផលប្រឡងបាក់ឌុបឆ្នាំ២០២៣នេះបានបង្ហាញថា មានសិស្សប្រឡងជាប់សរុបចំនួន ៩៨ ៤៦០នាក់ ស្មើនឹង ៧២,៨៩ភាគរយ។ ក្នុងនោះមានសិស្សបាននិទ្ទេស A ចំនួន ១ ៦៧៣នាក់ និទ្ទេស B ៦ ៩៦៤នាក់ និទ្ទេស C ១៨ ៣០៨នាក់ និទ្ទេស D ៣៤ ២៤៦នាក់ និងនិទ្ទេស E ៣៧ ២៦៩នាក់៕